Жаҳон банки маълумотларига кўра, ислом молия тизими маҳсулот ва хизматларидан кенг фойдаланишни йўлга қўйиш аҳолининг заиф қатламларига COVID-19 пандемиясининг молиявий таъсирини камайтиришда ёрдам беради.
Жорий йилнинг 6-9-октябр кунлари Жаҳон Банки гуруҳи ва Bank Negara Malaysia (Малайзия Марказий банки) ҳамроклигида “Барқарор ва инклюзив (кенг қамровли) молия форуми-2020” (Sustainable and Inclusive Finance Forum 2020) мавзусида онлайн конференция ўтказилди.
Форумнинг очилишида сўзга чиққан Жаҳон банки гуруҳининг Шарқий Осиё ва Тинч океани минтақаси вице-президенти Виктория Кваква, COVID-19 пандемиясининг салбий таъсирларини камайтириш, шунингдек БМТнинг Барқарор Ривожланиш мақсадлари 2030 (The 2030 Sustainable Development Goals) дастурини амалга оширишда Ислом молияси воситаларидан унумли фойдаланиш имконияти мавжудлигини таъкидлади.
Шунингдек, вице-президент Малайзиянинг жаҳон миқёсидаги ислом молия тизимидаги устунлигини эътироф этиб ўтди, ҳамда рақамли технологиялар ва янги ишланмалардан фойдаланиш – молия муассасаларининг харажатларини камайтиришга ва иқтисодиётнинг тез суръатларда ўсишига ёрдам беришини айтиб ўтди. «COVID-19 пандемияси ортидан рақамли молиявий хизматларнинг тезкор равишда йўлга қўйилиши молия бозорининг барча иштирокчилари учун янги имкониятлар яратди, бу эса, айниқса, аҳолининг кам даромадли қатламлари учун молиявий хизматлар самарадорлигини оширишга имкон беради», дея қўшимча қилди Кваква хоним.
Малайзия Марказий банки раиси Датук Нор Шамсиаҳ Моҳд Юнус ўз сўзида, пандемия Малайзия иқтисодиёти ва молиявий тизимини тиклаш/жонлаштириш учун “маблағларни жойлаштириш устивор йўналишларни қайта кўриб чиқиш ва аниқлаштириш”га туртки берганини, ҳамда мамлакат «яшил» сукук чиқариш бўйича дунёда етакчилик қилишда давом этаётганига эътибор қаратди.
Жаноб Нор Шамсиаҳ ислом молиясининг ижтимоий молия соҳасида муҳим ўрин тутиши, унинг ҳалол иқтисодий муносабатлар ва бойликларни жамиятдаги тақсимоти адолат асосида амалга оширилишига алоҳида эътибор қаратиши билан боғлиқ, деб қўшимча қилиб ўтди.
Ушбу форум доирасида Малайзиянинг молия тизимини ривожлантириш бўйича тажрибасини ёритишга ва шу орқали Малайзия тажрибасини қўлламоқчи бўлган мамлакатларга ёрдам беришга қаратилган мақола ва ҳисоботлар тақдим этилди, барқарор молия тизими ва ислом молияси соҳасини ривожлантиришда қандай иқтисодий сиёсат юритиш ва янги молиявий воситаларни қандай қилиб ривожлантиришни Малайзия мисолида тушунтириб берилди. Форум, шунингдек сиёсатчилар, иқтисодчилар, молиячилар, банклар ва бошқа молия муассасаларига барқарор ва инклюзив молия соҳасидаги сўнгги ўзгаришлар ва йўналишлар тўғрисида маълумот олишга ёрдам берди.