13-18 май кунлари Россиянинг Қозон шаҳрида “KazanForum 2025” – Халқаро иқтисодий форуми бўлиб ўтади. Ушбу тадбир доирасида Россияда илк бор AAOIFI (Ислом молия муассасалари учун бухгалтерия ҳисоби ва аудити ташкилоти)нинг йиллик мажлис-анжумани «Ислом молияси ва инвестициялар: барқарор ривожланиш ва глобал ҳамкорликни рағбатлантириш» мавзусида ўтказилади.
Бунгача ушбу муҳим тадбир фақат Баҳрайнда ташкил этилиб келган, аммо бу йил Россия ва мусулмон мамлакатлари ўртасидаги дипломатик муносабатлар ўрнатилганининг 35 йиллиги муносабати билан Қозон шаҳрида бўлиб ўтади.
AAOIFI – ислом молия муассасалари учун шаръий меъёрлар ишлаб чиқувчи етакчи халқаро ташкилот бўлиб, унинг қарорлари 50 дан ортиқ мамлакатлардаги молия бозорларига таъсир кўрсатади. Ислом молияси бўйича бундай муҳим тадбирнинг Россияда ўтказилиши, ушбу мамлакатда ислом молиясига бўлган қизиқиш ортиб бораётганлигини (эслатиб ўтамиз, ушбу мамлакатнинг таҳминан 20 миллион мусулмон аҳолиси бор) ва уни миллий иқтисодиётга интеграция қилишга интилиш борлигини кўрсатади.
Муҳокама қилинадиган асосий мавзулардан бири Россияда ислом молия механизмларини жорий этиш бўлади. Татарстон Республикаси Инвестицияларни ривожлантириш агентлиги раҳбари Талия Минуллина таъкидлашича, AAOIFI меъёрлари рус тилига таржима қилинган ва бу жараён давом этмоқда, бироқ уларни тўлиқ жорий этиш учун Солиқ кодекси ва бошқа қонунларга ўзгартишлар киритиш зарур.
«Биз учун AAOIFI меъёрларини Россия қонунчилигига мослаштириш муҳим. Биз ушбу меъёрларни араб тилидан таржима қиляпмиз, аммо уларни амалиётга жорий этиш учун тизимли ислоҳотлар керак», – деди Минуллина.
Конференцияда дунё миқёсидаги етакчи мутахассислар иштирок этадилар, жумладан:
- Шайх Иброҳим Бин Халифа Ал Халифа – AAOIFI раиси;
- Шайх Муҳаммад Тақий Усмоний – нуфузли ислом уламоси, AAOIFI Шариат кенгаши раиси;
- Рустам Минниханов – Татарстон Республикаси раҳбари
- Анатолий Аксаков – Россия Давлат Думаси депутати
- Олег Ганеев – Сбербанк бош вице-президенти
- Россия Марказий банки, Молия вазирлиги ва Россия банклар уюшмаси вакиллари
Тадбир қуйидаги ташкилотлар кўмагида ўтказилади: AAOIFI, Татарстон Республикаси Инвестиция агентлиги, Республика иқтисодиёт вазирлиги, Сбербанк (стратегик ҳамкор), “Росконгресс” жамғармаси ва бошқалар.
Таъкидлаш лозим, Россия аста-секин ислом банк-молия фаолияти учун очилмоқда. Хусусан, ҳамкорликка асосланган инвестицияларга урғу бермоқда. Ушбу тамойилларни жорий қилиш Яқин Шарқ ва Жануби-Шарқий Осиёдан сармоядорларни жалб қилишга ёрдам бериши мумкин.
KazanForum 2025 шу йўналишдаги муҳим қадам бўлиб, Россиянинг ислом дунёси билан иқтисодий алоқаларини мустаҳкамлашга ҳисса қўшади.
Манба: https://zainsk-inform.ru