Ассалому алайкум!
Маълумки, сўнгги йилларда халқимиз, айниқса, ёшлар томонидан ислом молияси соҳасига бўлган қизиқиш йилдан-йилга кучайиб бормоқда. Ҳозирча бу соҳа ривожланиб кетишига туртки берадиган керакли қонунлар қабул қилингани йўқ, соҳада мутахассислар етиштириш масаласи ҳам ҳал қилинди, деб бўлмайди, лекин мухлис халқимиз, хусусан, тадбиркорлар бу соҳада муайян ишлар қилишмоқда. Ушбу йўналиш ривожланган сари эса малакали ходимларга эҳтиёж ошмоқда. Шуларни инобатга олган ҳолда, биз сизларнинг эътиборингизга ислом молияси йўналишида илмий изланиш олиб бораётган мутахассис укамиз Руҳиддин Зайниддинов томонидан тайёрланган қуйидаги маълумотни ҳавола қилмоқчимиз.
Туркиядаги ислом иқтисодиёти ва молияси бўйича академик дастурлар
Туркияда ислом молияси соҳасида кадрлар тайёрлаш сиёсатига масъулият билан ёндашилади. Жумладан, Туркия бугунги кунда нафақат маҳаллий ислом молия тизими учун, балки ислом молияси энди ривожланаётган, шаклланаётган ва ушбу соҳага қизиқаётган бошқа мамлакатлар учун ҳам малакали кадрларни тайёрлаш бўйича олий таълим дастурларини таклиф қилишда муваффақиятга эришди.
Туркияда 2012 йилдан буён ислом иқтисодиёти ва молияси соҳасидаги магистратура дастурлари ва тадқиқот марказлари фаолият юритмоқда. Ушбу йўналишдаги биринчи бакалавриат дастури 2016 йилда бошланган.
Умуман олганда, бутун дунёда ислом иқтисодиёти ва молиясига оид тадқиқотлар сони, кўлами ва сифати ошаётганлигини таъкидлаш лозим.
Қуйидаги жадвалда эса Туркиядаги ислом иқтисодиёти ва молияси бўйича тадқиқот марказлари, университетлар ва уларнинг академик дастурлари берилган:
| № | Университет/ муассаса | Тадқиқот маркази / институти | Бакалавр | Магистратура | Докторан-тура |
| 1 | Афён Кочатепе университети | + | – | + | + |
| 2 | Аксарай университети | – | – | + | – |
| 3 | Анқара ижтимоий фанлар университети | + | – | + | – |
| 4 | Анқара Йилдирим Беязит университети | – | – | + | – |
| 5 | Ардахон университети | + | – | – | – |
| 6 | Бингол университети | – | – | + | – |
| 7 | Болу Абант Иззет Байсал университети | – | – | – | + |
| 8 | Бурса Улудаг университети | – | – | + | + |
| 9 | Ҳитит университети | + | – | + | – |
| 10 | Ибн Ҳалдун университети | + | – | – | – |
| 11 | Истанбул 29 Май университети | – | – | + | – |
| 12 | Истанбул Меденийет университети | – | – | + | – |
| 13 | Истанбул Сабаҳаттин Заим университети | + | + | + | + |
| 14 | Истанбул университети | + | – | + | + |
| 15 | Истанбул савдо университети | + | – | – | – |
| 16 | Карадениз техника университети | – | – | – | + |
| 17 | Кастамону университети | + | – | – | – |
| 18 | КТО Коня Каратай университети | – | + | – | – |
| 19 | Мармара университети | + | – | + | – |
| 20 | Нежмеддин Эрбакан университети | – | – | + | – |
| 21 | Сакаря университети | + | + | + | + |
| 22 | Сулаймон Демирел университети | – | – | + | – |
| 23 | Ширнак университети | – | – | + | – |
| 24 | Фан маданияти ва таълими жамғармаси (İLKE) | + | – | – | – |
| 25 | Ислом иқтисодиёти тадқиқот фонди | + | – | – | – |
| 26 | Маъруф жамғармаси | + | – | – | – |
Ҳозирда Туркияда ислом иқтисодиёти ва молияси соҳасида жами 23 та университетда (18 та давлат ва 5 та хусусий университет) 4 та бакалавриат, 21 та магистратура ва 9 та докторантура бўлган 34 та академик дастур мавжуд.
Руҳиддин Зайниддинов